Свет
14. September 2017 - 9:47

СБ на ОН повика на прекин на насилствата во Мјанмар

Генералниот секретар на Обединетите нации, Антонио Гутереш и Советот за безбедност на ОН ги повикаа властите во Мјанмар да го запрат насилството против припадниците на муслиманскиот народ Рохинџи, поради кое 400.000 лица без принудени да побегнат во Бангладеш.

Гутереш изјави дека ситуацијата во западната мјанмарска држава Ракин, најдобро може да се опише како „етничко чистење“.

- Кога една третина од народот Рохинџи морале да ја напуштат земјата, можете ли да најдете подобар збор за да го опишете тоа?, праша Гутереш на прес-конференцијата во Њујорк.

Тој вчера ги повика властите во Мјанмар да ја запрат воената акција, да го прекинат насилството, да се придржуваат кон владеење на правото и да го признаат правото на враќање на сите кои морале да ја напуштат државата. 

На синоќешната затворена седница на СБ на ОН, одржана по барање на Шведска и Велика Британија, 15-те членки на ова тело се согласија јавно да ја осудат ситуацијата.

Советот изрази загриженост поради „прекумерното насилство за време на безбедносните операции“ и повика да се преземат итни чекори за запирање на насилството во Ракин, деескалација на ситуацијата, повторно воспоставување ред и поредок, обезбедување заштита на цивилите и да се реши проблемот со бегалците.

Рохинџи е етничко муслиманско малцинство во Мјанмар. Припадниците воглавно живеат во државата Ракин во западниот дел земјата. Властите не ги признаваат за државјани, а будистичкото мнозинство со децении е обвинувано дека ги дискриминира и врши насилство над нив. Во Мјанмар и Ракин живее 10 проценти од светското население кое нема државјанство. 

Во 2012 година, судирот на Рахинџите и будистичките националисти резултираше со бројни убиства, и бегство на десетици илјади луѓе во Бангладеш, Малезија, Тајланд и Индонезија. Околу 200 илјади луѓе- воглавно Рохинџи, оттогаш живеат во бегалски кампови во Ракин. На 25 август, милитантни припадници на Рохинџите нападнаа неколку контролни пунктови на мјанмарската полиција, убивајќи голем број полицајци, по што безбедносните сили одговорија со антитерористичка операција против бунтовниците. Меѓународната заедница оцени дека жестокиот воен одговор е прекумерната употреба на сила мора да запре.