Свет
3. July 2020 - 20:37

САД забележаа нов дневен рекорд на новозаболени, државите донесуваат строги мерки и казнуваат за неносење маски

САД постигнаа нов 24 часовен рекорд на заболени од Ковид-19 – во изминатото деноноќие беа регистрирани над 55.274 инфекции, повеќе од претходниот ден кога беа забележани 54.771, јави Ен-пи-ар.

Земјата се подготвува за утрешното славење на Денот на независноста, но властите и здравствените работници се на штрек поради она што некои експерти го нарекуваат втор бран на пандемија која се шири најмногу во јужниот дел на САД.

На брифингот синоќа, д-р Ентони Фаучи, главниот инфектолог на САД, изјави дека доколку нема стриктно запазување на мерките за носење маски и физичка дистанца, можно е дневниот пораст на новозаболени да достигне и 100,000 сличаи.

Порастот на инфекциите принуди голем број на сојузни држави да преземат мерки за намалување на ширењето на вирусот.

Флорида стана жариште откако во изминатите недели бројот на инфекции се зголемуваше постојано. Државниот оддел за здравство синоќа објави нов рекорд од над 10.000 новозаболени за едно деноноќие. Епидемијата лесно се прошири откако државата дозволи отварање на бизнисите во мај, и не воведе режим за носење маски и физичка дистанца.

Тексас е уште едно жариште на епидемијата. Гувернерот Грег Абот вчера издаде наредба за обврзно носење маски во окрузите каде има барем 20 регистрирани случаи на коронавирус. Бројот на новопримени во болниците се зголемува, а во државата во изминатот деноноќие биле регистрирани речиси 8.000 нови случаи.

Во Канзас, минатата недела бројот на новозаболени се зголемил за 46 проценти, исто така и таму е издадена наредба за обврзно носење маски (со некои исклучоци) и држање физичка дистанца од шест фита (околу два метри).

Арканзас на почетокот на мај најпрва ги отвори бизнисите, државата сега се соочува со бран од нови заболувања кој дојде во јуни. Болничките капацитети со полни со сериозно болни пациенти, додека здравствените работници повикуваат на носење маски и држање физичка дистанца.

Во Аризона пак, речиси еден од четири тестови за короновирус излегува позитивен. Во Калифорнија, уште еден епицентар на коронавирусот, во изминативе две недели позитивните тестови се покачија за 37 отсто, додека хоспитализациите се зголемени за 56 отсто.

Полицијата во Лос Анџелес денеска најавија дека започнува со казнување на лицата кои ќе бидат фатени без маски во јавните места. Казната е во висина од 300 долари.