САД ветија помош од 155 милиони долари за Ирак

Американскиот државен секретар Џон Кери за време на посетата на Багдад вети хуманитарна помош за Ирак во висина од 155 милиони долари.

- Новата помош е наменета за најитните потреби на милионите раселени и загрозени Ирачани поради судирите во земјата и во регионот, се наведува во соопштението на Стејт департментот.

Во соопштението се додава дека американската хуманитарна помош за Ирак од 2014 година до денес изнесува повеќе од 778 милиони долари.

Ирак се бори против Исламска држава, која од 2014 годиан освои големи делови од земјата, поради што милиони Ирачани ги напуштија домовите.

Според податоци на Обединети нации, од вкупно 23 милиони Ирачани на 10 милиони итно им е потребна хуманитарна помош, како и на трите милиони кои живеат во областите окупирани од ИД.

Кери вчера допатува во ненајавена посета во Багдад, на разговори со претставниците на ирачките власти посветени на борбата против џихадиситчата група.

- Фактот дека ИД во Ирак не е во офанзива значи дека ја губат иницијативата, истакна Кери во Багдад.

Тој изрази поддршка на ирачкиот премиер Хајдер ал Абади, кој е блокиран во политичката криза со ривалите кои го обвинуваат дека не ги исполмил ветувањата за политички и економски реформи.