Свет
28. August 2021 - 8:49

САД извршија напад со дрон против припадник на Исламската држава во Авганистан

Американската војска соопшти дека во текот на ноќта извршила напад со дрон против „организаторот“ Исламска држава, Хорасан (ИСИС-К), што е прва официјална американска воена операција по неодамнешните самоубиствени напади на групата врз аеродромот во Кабул.

– Нападот со беспилотно летало се случи во авганистанската провинција Нангархар. Според првите информации, ја убивме целта, рече Бил Урбан од Централната воена команда на САД.

Тој додаде дека според нивните информации, нема цивилни жртви и наведе дека ова е прв воздушен напад на американската армија по нападот на аеродромот во Кабул, кој беше извршен во четвртокот.

Нападот на американската армија се случи додека под строг надзор продолжува евакуацијата од аеродромот во Кабул.

Пред американскиот напад, Амбасадата на САД во Кабул побара од своите граѓани да ги напуштат пристапите до аеродромот.

Исламската држава ја презеде одговорноста за нападот во четвртокот во кој загинаа 13 американски војници и неколку десетици цивили.