Балкан
9. May 2017 - 8:16

САД го повика Косово да го ратификува договорот за границата со Црна Гора

САД ги повикаа парламентарните политички партии во Косово да го ратификуваат договорот за демаркација на границата со Црна Гора, посочувајќи дека одложувањето и штети на довербата и угледот на Косово во странство.

Преку соопштение, американската амбасада во Приштина побара од Владата на Косово повторно да го процесуира договорот во парламентот и пратениците „да го ратифкуваат без никакво одложување“.

- Време е да се стави крај на политичките пречки во Република Косово, така што Парламентот и Владата ќе почнат да бележат напредок и во други прашања од витално знаење за доброто на граѓаните на Косово. Одложувањето на ратификацијата е на штета на слободното патување на косовските граѓани во Европа, се наведува во соопштението.

Во соопштението уште стои, дека демаркационата (граничната) линија со договорот е правилно одредена и оти тоа било утврдено и од страна на американски експерти.

Косовската влада требаше на вчерашната седница да одлучи документот да го достави до парламентот за усвојување в среда. Но седницата на Владата, е одложена за утре, бидејќи во салата за состаноци дошле само министрите од Демократскиот сојуз на Косово, на премерот Иса Мустафа, додека членовите на Владата од Демократската партија на Косово и другите коалициски партнери отсуствувале.

Договорот за демаркација на границата меѓу Косово и Црна Гора е потпишан во 2015 година. На истиот се спротивставуваат опозициските партии, кои обвинуваат дека со овој документ Косово губи над осум илјади хектари земјиште. Кога документот беше ставен на дневн ред на парламентот, опозициските пратеници фрлаа солзавец во собраниската сала.

Инаку, на седницата која треба да се одржи утре, на дневен ред треба да биде и барањето за изгласување недоверба на премиерот Мустафа.