Руските медиум обвинуваат: Путин на телохранителите им поделил плацеви во најскапиот дел на Москва

Рускиот весник „Новаја газета“ пишува дека телохранителите на рускиот претседател Владимир Путин и нивните семејства добиваат вредни плацеви на кои градат луксузни куќи, во близина на резиденцијата на Путин во предградие на Москва.

 

Овој независен руски весник ги објави резултатите од истражувањето според кои повеќемина агенти на Федералната служба за заштита (ФСО) и членовите на нивните семејства се населиле на плацеви во близина на резиденцијата на Путин, во зоната која се смета за најскапа во Русија, пренесува агенцијата АП.

 

„Новаја газета“ опишува како вработените во државна компанија во таа област биле намамени да го продадат земјиштето за незначителни суми во текот на деведесеттите години на минатиот век.

 

Се тврди дека овие парцели биле евтино продавани, па дури и бесплатно делени на агенти на ФСО и на нивните семејства.

 

Портпаролот на рускиот претседател, Дмитриј Песков, кого новинарите денеска го прашаа за овие наводи, рече дека агентите споменати во медиумите поднесуваат годишни пријави за нивните приходи и имот, кои властите детално ги проверуваат.