Свет
30. March 2018 - 22:08

Русија тестираше нова интерконтинентална балистичка ракета

Руската војска соопшти денеска дека успешно ја тестирала својата најнова интерконтинентална ракета. 

Во соопштението на Министерството за одбрана се наведува дека ракетата била лансирана од Плесетска во северозападна Русија и дека биле тестирани перформансите на ракетата Сармат во раната фаза од летот.

Ракетата Сармат треба да ја замени ракетата Војевода од советско производство, која на Западот му била позната под името „Сотона“. 

Рускиот претседател Владимир Путин рече на почетокот на месецот дека тежината на ракетата Сармат е 200 метрички тона и дека таа има поголем дострел од Сотона, што и овозможува да го прелета Северниот или Јужниот пол и да погоди мета каде било во светот.