Македонија
31. August 2016 - 8:35

Ребалансот на Буџетот на седница на матичната собраниска комисија

Собраниската Комисија за финасирање и буџет денеска треба да ја продолжи расправата за новиот ребаланс на Буџетот за 2016 година  со кој треба да се обезбедат дополнителни 2,240 милијарди денари за постојана резерва за надминување на последиците од поплавите во Скопско и Тетовско и да се изврши ревидирање на буџетскиот дефицит на ниво од четири отсто од БДП. 

Вчера на првиот ден на расправата во Комисијата пратениците од ВМРО-ДПМНЕ порачаа дека ребалнсот на Буџетот е наменски и се носи за обесштетување на граѓаните погодени од поплавите и оти во моментов е единствениот начин на кој може да им се помогне на настраданите.

Нивните колеги од СДСМ, пак, беа децидни дека на поплавените мора да им се помогне, но со средства од постојните пари во државната каса и нивна пренамена, а не со нови задолжувања и зголемување на буџетскиот дефицит. СДСМ поднесе и 11 амандамни со кои предвидува да се скратат 27 милиони евра за да се намали буџетскиот дефицит, а во исто време да се обезбедат пари за обесштетување на граѓаните.

И ДПА беше против ребалансот на Буџетот со образложение дека е премногу задоцнет.

Расправата за ребалансот во Комисијата за финансирање и буџет, според собранискиот деловник, може да трае десет дена. На пленарна седница, пак, оваа точка е закажана за 19 септември.