Прва пресуда за случајот „Рекет“ - 3 години затвор за второобвинетиот

Признанието вина на обвинетиот во Рекет, му донесе казна затвор од три години. Зоран Милевски Кичеец е прогласен за виновен бидејќи ги договарал средбите меѓу Боки 13, Орце Камчев и неговата сопруга.

Обвинителство е задоволно од пресудата, а откако ја добие ќе одлучи дали ќе се жали. Русковска не ја исклучува можноста Милевски да биде повикан за сведок во случајот.

„Може да се појави. Може тоа да биде предлог или на обвинителството или на одбраната, во дополнување на доказната постапка“, вели Вилма Русковска, Обвинител.

Одбраната најави дека ќе се жали на пресудата ама не очекува Милевски да биде повикан да сведочи за Рекет.

„Не гледам Јас никаква причина за тоа. Ако беше сведок обвинетиот, сега осуден Милевски, сега нема да имаше ниту обвинение ако прифатеше за сведок. Значи такви сознанија Јас немам“, вели Александар Новаковски, Адвокат.

Со пресудата за Милевски, „Рекет“ продолжува само за Катица Јанева и Боки 13. Во петок пред судот ќе сведочат бизнисменот Орце Камчев и неговата сопруга кои на обвинетите во Рекет им исплатиле еден и пол милион евра. Според обвинението, парите ги добил Јовановски кој влијаел врз Јанева да му го укине притворот на Камчев и да му издаде времен пасош. За ова поранешната специјална обвинителка зела 50 илјади евра и мебел вреден пет илјади.