Македонија
27. јуни 2018 - 8:43

Промоција на „Небесна пантомима“ од Зоран Анчевски

Во Музеј на Град Скопје вечер во 20 часот ќе биде промовирана новата збирка поезија на Зоран Анчевски „Небесна пантомима“, во издание на Темплум.

Книгата ќе ја претстават писателките Оливера Ќорвезировска и Магдалена Хорват, која заедно со авторот ќе чита и дел од песните.

Зоран Анчевски (р. 1954, Скопје) е истакнат македонски поет, есеист, литературен преведувач и професор по англо-американска литература.

Досега ги има објавено стихозбирките: „Патувања низ скршени слики“ (1984), „Стратегија на поразот“ (1994), „Линија на отпорот“ (1998), „Превод на мртвите“ (2000), „Див мир“ (2004), „Избрани песни“ (2008), „Историја на ветрот“ (2009), како и обемната студија „За традицијата“ (2007).

Преведувач е и уредник на голем број поетски антологии, избори и прозни дела на врвни светски автори на македонски јазик. За својата преведувачка дејност ја има добиено наградата Григор Прличев во 2001.

Добитник е и на наградата на Студентски збор за најдобра дебитантска книга во 1985, како и на престижното меѓународно признание за поезија Ѓакомо Леопарди во 2004.

Член е на ДПМ и актуелен претседател на Македонскиот ПЕН центар, Од 2003-2007 бил претседател на Управниот одбор на меѓународниот фестивал Струшки вечери на поезијата.