Македонија
27. December 2019 - 10:25

Приведени 12 лица, сузбиена криминална група за шверц на хероин и кокаин, запленета дрога вредна милион евра

Во рамки на активностите за борба против недозволената трговија со дрога, во ноември и декември 2019 година спроведена е меѓународна истрага со австриската и српската полиција во која се пресечени повеќе меѓународни канали и запленети се 17 килограми хероин и пет килограми кокаин, кои на нелегалниот пазар достигнуваат вредност од околу 1 000.000 евра.

МВР денеска соопшти дека се приведени 12 лица.

Во ноември  2019 година од страна на МВР во координација со Основното јавно обвинителство за гонење на организиран криминал и корупција во соработка со МВР на Република Србија и австриската полиција започната е меѓународна истрага за откривање организирана криминална група составена од македонски државјани кои вршеле продажба и транспорт на хероин во регионот и во земјите од Западна Европа.

– На 20.11.2019  во Долна Австрија – Р Австрија, од страна на австриската полиција лишени од слобода се двајца македонски државјани, С.Р. (27) и К.Џ. (58)  при што во возило со македонски регистерски ознаки, во специјално направен бункер, пронајдени се пет килограми наркотична дрога хероин со многу висок квалитет. Во рамки на меѓународната истрага на 03.12.2019 година во Унгарија на излез на граничниот премин Хоргош биле лишени од слобода македонските државјани Е.А. (48) од Скопје, нејзината керќа Ш. А. (21) од  Скопје  и Ш.И. (27) од Скопје, поради тоа што при претрес во џип мерцедес биле пронајдени пет килограми наркотична дрога кокаин во специјално направен бункер, се појаснува во соопштението од МВР.

По преземени мерки и активности на австриската полиција исто така, на 06.12.2019 година во Виена  лишени од слобода се албанскиот државјанин Б.Т. (30) и македонскиот државјанин Б. Џ. (47) од Битола, кој привремено престојувал во Виена, при што е пронајдена пет килограми  хероин.

Меѓународната истрага продолжи со преземање мерки и активности, при што на 26.12.2019, во Република Србија, во градовите Врање и Нови Сад, во заедничката и координирана акција на српската и македонската полиција, лишени се од слобода тројца македонски државјани и тоа Р. Ф. (48) од Тетово, А.С. (45) од Скопје и С. С. (47) од Куманово во обид да извршат продажба на хероин на српски државјанин, која била сокриена во патнички автомобил во резервно тркало. Хероинот, информираат од МВР, бил пакуван во 13 пакувања со вкупна тежина од седум килограми со многу висок квалитет.

Веднаш, по лишувањето од слобода и заплената на наркотичната дрога, од страна на Одделот за криминалистичка полиција, Одделот за сузбивање на организиран и сериозен криминал и Одделот за специјални полициски операции во координација со Основното јавно обвинителство за гонење на организиран криминал и корупција започнати се претреси на две локации во Тетово, две во Скопје и една во Куманово, кај лица кои се дел од оваа криминална група.

При претресите, лишени од слобода се двајца македонски државјани Х.Ф. (45) од Тетово и Ј.А. (48) од населба Синѓелиќ, кои се дел од организираната криминална група и пронајдени се парични средства кои потекнувааат од продажба на наркотична дрога, помала количина на наркотична дрога кокаин и една вага, како и многу докази со кои се потврдува нивната инволвираност во вршењето на кривичното дело недозволена трговија со наркотични дроги, стои во соопштението од МВР.

По целосно комплетирање на доказите против лицата ќе биде поднесена соодветна кривична пријава до Основното јавно обвинителство за гонење на организиран криминал и корупција.