Балкан
17. October 2016 - 17:22

Притвор од 72 часа за приведените српски државјани во Црна Гора

Притвор од 72 часа им е одреден на сите 20 српски државјани, кои беа уапсени во Црна Гора на денот од парламентарните избори под сомнение дека учествувале во криминална и терористичка организација.

Според црногорските медиуми, српските граѓани во два часот по полноќ биле сослушани пред Специјалното обвинителство.

Во соопштението на Специјалното обвинителство се наведува дека групата формирала „криминална организација“ во текот на овој месец со цел „да изврши дејствија врз законодавната и извршната власт во Црна Гора“.

Обвинителството додава и дека групата планирала вооружен напад врз граѓани, кои веројатно ќе се соберат пред зградата на Парламентот по завршувањето на изборниот ден, како и против полицајци. Тие потоа планирале да влезат во зградата на Парламентот и да прогласат победа на „некои политички партии“.