Македонија
22. јуни 2016 - 14:37

Претставен проектот „Градот низ детските очи“

Во Археолошкиот музеј на Македонија денеска беше претставена реализацијата на проектот „Градот низ детските очи“, поддржан од Министерството за труд и социјална политика. 

Проектот веќе три години наназад сплотува и креативно ги поврзува сите деца на возраст од пет до шест години и нивните учителки од сите јавни детски градинки во Република Македонија. Главната цел на проектот е јакнење на чувството на припадност кон својата држава. 

Во рамки на проектот, годинава децата од градинките учеа, твореа, креираа и набљудуваа се она што е поврзано со нивното родно место. Преку овие активности кај децата се поттикнува високо ниво на распознавање и именување на карактеристичните обележја на културата на својот град, неговата историја, институции, споменици...

На завршната манифестација беше претставена изложба на детски ликовни творби, а настапија и децата од градинката „Осми март“ од општина Кисела Вода, од објектот Пеперутка 1 и 2.