Македонија
7. September 2015 - 17:50

Претседателот Иванов на Економски форум во Полска

Претседателот на Република Македонија, Ѓорге Иванов, од утре ќе престојува во работна посета на Република Полска, по повод учеството на 25. Економски форум, што ќе се одржи во Круница – Здруј.

Како што соопшти кабинетот на престедателот, во рамки на форумот, Иванов ќе се обрати на сесијата насловена „Кон флексибилна Европа: Стратегии за иднината“, и на Форумот на млади лидери на сесијата „Лидери на утрешнината – Какви лидери ѝ се потребни на Европа во 21 век“. Во фокусот на годинешниот форум е економската и политичката ситуација во Европа и во светот, енергетската безбедност и  иновациите.

За време на посетата предвидено е претседателот Иванов да оствари средба со претседателот на Република Полска, Анджеј Дуда.

Економскиот форум, кој оваа година се одржува по 25. пат, претставува најголема и најреномирана конференција во Централна и Источна Европа со фокус на економијата и политиката во овој дел од континентот. Целта на оваа иницијатива е да се создаде поволна клима за развој на политичката и економската соработка во Европа.

Во македонската делегација предводена од претседателот Иванов е и министерот без ресор, Фуркан Чако, кој пред полските бизнисмени ќе ги презентира поволностите и можностите за инвестирање во РепубликаМакедонија.