Спорт плус
14. August 2015 - 16:28

Премиерот ги прими членовите на Специјалната олимпијада

Македонски премиер Никола Груевски во петокот ги прими членовите на Специјалната Олимпијада Македонија кои учествуваа на Светските летни олимписки игри на Специјалната олимпијада одржана во Лос Анџелес.
 
Премиерот Груевски упати честитки за остварениот успех и ангажманот на членовите на македонската специјална олимпијада што резултираше со значаен успех и извојување на 12 медали.
 
Груевски истакна дека развивањето на спортскиот дух, ентузијазмот и волјата и подготвеноста која ја покажуваат учесниците на олимпијадата во различните спортови е за почитување и доказ за нивниот посветен пристап, но и пример кој треба да го следат сите останати.
 
Членовите на Специјалната Олимпијада Македонија на премиерот Груевски му доделија признание изразувајќи благодарност за поддршката и ангажманот на Владата која нивната организација ја добива во реализација на активностите.
 
Информирајќи го премиерот Груевски за постигнатите резултати и пренесувајќи ги личните искуства од натпреварувањата во сите дисциплини каде учествуваа, членовите на Специјалната Олимпијада истакнаа дека учеството на ова натпреварување претставува најуспешен настап на македонска делегација на некои олимписки игри од ваков карактер.
 
Премиерот Груевски изрази подготвеност и отвореност за понатамошна поддршка и соработка со Специјалната Олимпијада Македонија.