Свет
9. March 2018 - 14:22

Познат составот на новата германска Влада

Социјалдемократската партија на Германија (СПД) денеска ги соопшти имњата на нејзините министри во идната германска Влада, со што е познат целосниот состав на новиот Кабинет на канцеларката Ангела Меркел.
 
Во новата германска Влада шестмина министри ќе бидат од редовите на СПД, меѓу кои е и новиот шеф на дипломатијата Хајко Мас, кој досега беше министер за правда и заштита на потрошувачите.
 
Досегашниот градоначалник на Хамбург и в.д. лидер на СПД, Олаф Шолц ќе биде нов вицеканцелар и министер за финансии, додека со Министерството за труд ќе раководи 45-годишниот Хубертус Хајл. 
 
Социјалдемократите го задржуваат ресорот за правда, со кој сега ќе раководи поранешната генерална секретарка на СПД и досегашна министерска за женски прашања, Катарина Барлеј.  
 
Ново министерка за семејство е досегашната градоначалничка на берлинската општина Нојкелн, Франциска Гифеј. Најголемо изненадување меѓу министрите социјалдемократи е Свења Шулце, која ќе раководи со Министерството за заштита на животната средина.
 
Христијанско демократската унија (ЦДУ) на Меркел, уште претходно ги соопшти имињата на нејзините министри во Владата. Министер без ресор од редовите на партијата на Меркел во Владата ќе биде анестезиологот Хелге Браун, кој важи за човек кој од позадина има големо влијание врз носењето одлуки во ЦДУ.
 
Партијата го номинира Петер Алтмајер за нов министер за правда, додека со Министерството за здравство ќе раководи Јенс Шпан, кој важи за главен критичар на Меркел меѓу партиските членови.
 
Досегашната министерка за одбрана Урсула фон дер Лајен и натаму ќе раководи со истиот ресор, додека на чело на Министерството за земјоделство ќе биде „новата надеж на демохристијаните“ Јулија Клекнер.
 
Министерка за образование и наука ќе биде Ања Карличек, а ЦДУ ќе ги даде и државните министри за интеграција и за култура, на кои функции ќе застанат Анете Видман-Мауц и Моника Гритес.
 
Сестринската партија на ЦДУ, баварската Христијанско социјална унија (ЦСУ) го доби Министерството за внатрешни работи, со кое ќе раководи партискиот лидер Хорст Зехофер.
 
Од редовите на оваа партија ќе биде и новиот министер за сообраќај Андреас Шојлерер, кој важи за еден од најблиските соработници на Зеховер, како и новиот прв човек на Министерството за развој, Гер Милер.
 
Списокот на членови на новиот Кабинет на Меркел го заокружува државниот министер за дигитализација Доротеа Бер од редовите на ЦСУ.
 
Се очекува наскоро Меркел и официјално да го достави предлогот на кандидати за членови на нејзината нова Влада, по што таа и официјално ќе ја преземе должноста.