Бизнис
21. September 2016 - 13:39

Повисоки субвенции и брендирање на македонскиот мед, бара Пчеларската федерација

Државата треба да ги зголеми субвенциите за пчеларите кои годинава имаат мали приноси и зголемените загуби и да помогне да се направи брендиран македонски мед, смета Пчеларската федерација на Македонија. 

Најважно, според федерацијата, е да има услови за производство на квалитетен македонски мед што ќе може и да се извезува, но и да се заштитат крајните потрошувачи на кои им се нуди и мед од увоз и често не знаат да го утврдат потеклото.

- Скоро добивме информација дека во штипскиот регион се увезени речиси 40 тони мед, кои ја намалиле цената на 190 денари. Кај нас во големопродажба цената е над 250 денари за килограми, а бидејќи  ова е слаба година  останавме на заштитена цена од 350 денари, рече денеска на прес-конференција Јане Марков, претседател на Пчеларската федерација на Македонија.

Според него, со помош на државата треба да се направи брендиран македонски мед.

- За да го наравиме тоа потребни се уште многу активности. Федерацаијата е новозодадена асоцијација која цели кон подобрување  на пчеларството и гарантирање дека ќе се направи квалитетен производ  но и да бидат заштитени крајните потрошувачи, рече Марков.

Во Македонија постојат над 8.000 пчелари со над 260.000 пчелни семејства. Годинава, според сознанијата на Пчеларската федерација, просекот на добиен мед е многу слаб со само 1,8 килограми презимено пчелно семејство и 7,3 килограми од селидбено пчеларење.

- ПФМ прогласува елементарна непогода во пчеларството за 2016 година и ќе бара помош од државата за спас за презимување на пчелите и пчеларството, посочи Марков, дополнувајќи дека државата треба да го зголеми од 600 на 1.000 денари, надоместот што го дава за пчелно семејство, вклучено за производство на пчелни матици, да обезбеди садници за пошумување со медоносни растенија.

За самостоен бизнис во пчеларството, како што укажа, со приходи за едно домаќинство  се потребни најмалку 200 пчелни семејства, но да биде ориентиран и со другите пчелни производи.

Според Сашо Ѓуровски, претставник од Министерството за земјоделство, шумарство и водостопанство, за повисоки приноси треба да се практикува селидбено пчеларење и да се користи селектирана матрица.  - Лани просекот на едно пчелно семејство е под 10 килограми мед. Тоа покажува дека климатските промени си го прават своето. Но, климатските промени влијаат и низ цела Европа. Ако ја споредиме со која било земја Македонија убедливо води со најнизок принос по пчелно семејство, но за висок принос е потребно и селидбено пчеларење и да се користи селектирана матица, рече Ѓуровски.

Најсигурно за потрошувачите, укажуваат од федерацијата, е да купуваат мед само од познат пчелар во кој имаат доверба. Медот што го купуваат треба да биде компактен и проѕирен, со иста структура во теглата. При отворање на теглата треба да има специфичен мирис на мед.

- Ако не знае некој од кој да купи мед треба да побара тој да биде кристализиран. Тоа му е една поголема сигурност, истакна Венче Билбиловски, претседател на Организацискиот одбор на 12. манифестација  „Денови на македонскиот мед“, што ќе се одржува од утре до 25 овој месец на ул. „Македонија“ во Општина Центар.

На манифестацијата ќе се презентираат и дегустрираат мед и медни производ. Тоа е можност за директни контакти со пчеларите и добивање совети како да се препознае квалитетн мед. Традиционално, е предвидена дегустација за амбасадорите во државава и избор на највкусен мед, како и учество на основци од училиштата во општина Центар.

Според статистичките податоци, во Македонија на годишно ниво се троши само 700 грама мед по глава на жител, во Германија потрошувачката е 9, а во Јапонија 16 килограми. Кај нас, посочуваат од федерацијата, медот се користи како лек, а во другите држави претставува храна.