Фудбал
6. October 2016 - 23:19

Пораз на македонските репрезентативци од Израел

Фудбалската репрезентација на Македонија иако одигра добар натпревар против Израел на „Филип Втори“, сепак со пораз ја напушти Националната арена и остана без бодови по две одиграни кола во квалификациите за пласман на СП.

Иако потајно се надевавме дека најпосле ќе биде ставен крај на црната серија без победа, квалификациската пресметка на националната арена “Филип Втори” против селекцијата на Израел, заврши со минимален триумф на гостинот од 2:1.

И покрај одличната игра и создадените шанси во првиот дел, особено на Пандев кој промаши чист зицер при 0:0, Израел сепак со убедливи 2:0 го доби првото полувреме. Стрелци на погодоците беа Томер Хемед и Тал Бен Хаим, а особено наивно беше примен вториот гол кога Бен Хаим ја измеша нашата одбрана и голманот Богатинов.

Избраниците на Игор Ангеловски заиграа поангажирано во второто полувреме и сигурната предност на гостинот на намалија со погодокот на Илија Несторовски, а во судиското продолжение, поточно во 94 минута, повратникот во националниот тим, Адис Јаховиќ, промаши удар од белата точка.

После две одиграни кола во групата “Г”, Македонија е на претпоследната позиција со ниту еден освоен бод, додека лидерската позиција е во сопственост на Албанија која веќе освои шест бода.

Резултати: Македонија – Израел 1:2, Италија – Шпанија 1:1, Лихтенштајн – Албанија 0:2. Табела: Албанија 6, Шпанија 4, Италија 4, Израел 3, Македонија 0, Лихтенштајн 0 бодови.