Балкан
1. December 2016 - 12:38

Поради неповолни временски услови евакуиран бегалски камп на Олимп

Грчките власти ги евакуираа сите бегалци и мигранти од кампот во Петра на Олимп, поради исклучително неповолните временски услови кои преовладуваат во областа, јави дописникот на МИА од Атина.

Член на советот на општината Катерини, Никос Папазиогас за државната новинска агенција АНА-МПА изјави дека дека повеќето од бегалците биле преместени во нов прифатен центар во областа на езерото Волви, 65 лица се сместени во еден хотел на плажа во Катерини и за два дена и тие ќе бидат префрлен во Волви.

Евакуацијата на мигрантите почна уште вчера, откако беше расчистен патот кој води до прифатниот центар, кој беше отсечен поради снег.

Папазиогас изјави дека општината и претходно ги предупредила властите дека локацијата не е погодна за камп и често е недостапна поради снег.