Македонија
16. September 2019 - 10:27

Поради изградба на бетонски пропуст изменет сообраќаен режим кон кумановската населба „Железничка Станица“

Општина Куманово информира дека поради изградба на армиран бетонски пропуст кој се наоѓа на улицата „Железничка“ и „Индустриска“ направена е измена на сообраќајниот режим во тој дел од Куманово и воведена е забрана за движење на возила и пешаци, се додека траат градежните активности.

Изградбата на пропустот се спроведува во рамки на реконструкцијата на регионалниот пат Куманово-Никуштак, која ја спроведува Јавното претпријатие за државни патишта, а општина Куманово  го реконструира мостот, преминот, на дел од улицата „11 Октомври“ на крстосницата со улицата „Индустриска“ кон населбата„ Железничка станица“. За реконструкцијата на мостот општината одвои 4,1 милиони денари, а изведувач на активностите е компанијата „Хуљуси“, информираа претходно од секторот за комунални дејности.

Инаку, реконструкцијата на регионалниот пат Куманово-Никуштак почнува од влезот на Куманово, поминува низ населбата „Железничка Станица“, селата Черкези,Љубодраг, Ново Село, Умин дол до село Никуштак. Оваа инвестиција се реализира со средства одвоени од Владата, преку јавното претпријатие за државни патишта.