Свет
20. August 2015 - 8:42

Полицајци застрелаа тинејџер Афроамериканец кој на нив вперил пиштол

Полицајци во Сент Луис застрелаа тинејџер Афроамериканец, кој врз нив вперил украден пиштол.

Началникот на полицијата во градот во државата Мисури во централниот дел на САД, Сем Дотсон изјави дека тој бил убиен додека полицајци се обидувале да спроведат рација во кварт со високо ниво на криминал вчера утро по локално време.

Застреланото момче било идентификувано како 18-годишниот Мансур Бол-Беј. Другиот црнец, кој успеал да избега исто така е тинејџер.

Полицијата утврдила дека огненото оружје на убиениот е украдено. На местото бил откриен кокаин.

Десетици луѓе се собраа на протест во Сент Луис по убиството. тие фрлале камења врз полицајците, кои одговориле со солзавец. Тројца демонстранти биле уапсени.

Случајот доаѓа десет дена по демонстрациите, со кои беше одбележана годишнината од убиството на невооружен тинејџер црнец од полицијата во предградие на Сент Луис Фергусон, што предизвика бран насилни протести во целата земја.