Почнаа активностите за 12. издание на Пијанечко-малeшевската свадба

Со посета на институции и канење на гостите, членовите на КУД „Гоце Делчев“ од Делчево ги почнаа активностите за Пијанечко-малешевската свадба. Манифестацијата се одвива неколку дена, а главниот дел ќе се одржи в сабота.

 

Како што истакна организаторот Зенил Реџепов, денешниот адет на канење на гостите се прави на стар автентичен начин како што некогаш налагале обичаите на овие простори.

 

- Нашите членови од КУД Гоце Делчев“ денес со шарени бонбони, погача и пијанечка ракија од сина слива ги покануваат вработените во институциите, фирмите и граѓаните на Делчево и регионот за да присуствуваат на годинашното издание на Пијанечко-малешевската свадба. Како организатори ние сме подготвени за финалната вечер која ќе се одржи в сабота, 8 септември, на летната сцена во Делчево, рече Реџепов.

 

Главни носители на 12. издание на пијанечкиот бренд се младоженците Милена Параскова и Иле Гоцевски, кои на летната сцена во градскиот парк во Делчево в сабота ќе ја крунисаат својата долгогодишна љубов.

 

Во предвечерието на 12. издание на Пијанечко-малешевската свадба ќе се одржи и 42. издание на Меѓународниот музички и фолклорен фестивал на кој ќе настапат повеќе музички и фолклорни групи од земјава и странство.

 

Настанот во партнерство со општините Делчево, Пехчево и Берово е поддржан од Министерството за култура.