Отворен ден за едукативни програми и можности за стипендии

Во организација на Македонија 2025 денеска ќе се одржи Отворен ден за едукативни програми на кој ќе бидат претставени неколку програми за целосно студирање, програми за усовршување вештини во деловниот свет и управување со компании, како и можности за стипендирање. 

На настанот ќе бидат претставени програмите што ги овозможува Одборот за едукација на Македонија2025 во соработка со неколку видни универзитети во САД и Канада. Во овој дел ќе бидат претставени програмите на школото за бизнис и менаџмент Келог, центарот за едукација на извршен кадар Шулух, Лидер Проект на школото за бизнис Ричард Ајви и програмата за претприемачи на Џон Битов.

Во рамки на Отворениот ден ќе биде претставена и програмата за додипломски и постдипломски студии на Руската претседателска академија во Москва, РАНЕПА. 

Дел од поранешните учесници на едукативните програми на присутните ќе им го претстават своето искуство, а членот на Клубот на лидери на Македонија2025, Никола Ќурчиски и висок претставник на РАНЕПА ќе ги претстават разновидните можности за стипендирано студирање во оваа институција.