Македонија
26. April 2018 - 12:41

Отворен Центар за одржување стандардизирани испити по кинески јазик во рамки на Институтот „Конфуциј“

Македонските студенти ќе можат да добијат објективна оценка за стекнатото знаење по кинески јазик и вистинска потврда за стекнатите јазични компетенции во лиценцираниот Центар за одржување стандардизирани испити по кинески јазик.

Ова го истакна потпретседателот на Универзитетскиот совет на Југозападниот универзитет за финансии и економија од Ченгду, НР Кина на отворањето на Центарот во рамки на институтот „Конфуциј“ при Универзитетот „Св.Кирил и Методиј“- Скопје. Посочи дека бројот на студенти и курсисти кои го изучуваат кинескиот јазик се зголемува, програмата со културни настани е поразновидна и побогата. 

Станува збор за прв ваков Центар во Македонија, нагласи тој и изрази надеж дека ќе придонесе во иднина значително да се зголеми бројот на студенти кои ќе го изучуваат кинескиот јазик.

Центар за испити по кинески јазикРекторот на Универзитетот „Св.Кирил и Методиј“-Скопје, Никола Јанкуловски рече дека отворањето на Центарот се реализира неколку месеци по отворањето на заедничкиот Центар за студии за Кина и земјите од Централна и Источна Европа и Балканот, кој во декември го основале на Факултетот за меѓународен бизнис при Југозападниот универзитет за финансии и економија од Ченгду, чија канцеларија работи во рамки на Институтот „Конфуциј“ во Скопје.

- Фактот што ќе им овозможиме на нашите студенти можност да ги реализираат своите професионални амбиции и да бидат поконкурентни на меѓународниот пазар на труд ја покажува заложбата на Универзитетот „Св.Кирил и Методиј“ во Скопје за квалитетно високо образование и создавање врвен професионален кадар, потенцира Јанкуловски.