Обвинителството бара одземање на пасошот на сопругот на Шеќеринска

Јавното обвинителство (ЈОРМ) денеска побара да му се одземе пасошот на сопругот на Шеќеринска Бобо Дајнерс. Од ЈОРМ во писмено соопштение денеска велат дека се исполнети сите услови за одредување на мерки на претпазливост.

„ Постапувајќи по поднесена кривична пријава од Министерството за внатрешни работи, како и по утврдување на постоење на основано сомнение дека е сторено кривичното дело, надлежен јавен обвинител од Основното јавно обвинителство – Скопје поведе постапка против едно лице за сторено кривично дело – Злоупотреба на службена положба и овластување. Ценејќи дека се исполнети законските основи, до судија на предходна постапка во Основниот суд Скопје 1 – Скопје, поднесен е и Предлог за определување на Мерки на претпазливост и тоа: привремено одземање на патна исправа, односно забрана за нејзино издавање и обврска за повремено јавување во суд.“ – стои во соопштението на ЈОРМ

Според ЈОРМ Божидар Јанковски се сомничи дека злоупотребувајќи ја службената положба и овластување, како службено лице вршел закуп на станови на кои се јавува како приватен сопственик. При тоа, по вршење на закупот, просториите не биле користени од страна на друштвото што го управувал.

„За наводите во сега поднесената кривична пријава, надлежното Основно јавно обвинителство – Скопје во текот на 2014 година прими Иницијатива од Државната комисија за спречување на корупција. Во тој временски период , а по наводите на Иницијативата, обвинителството не најде доволно докази за поведување постапка, по што беше донесена Резолуција со која постапката беше запрена. Потенцираме дека донесување на резолуција не претставува ограничување, односно елиминирање на натамошно водење кривична постапка доколку се откријат нови моменти, односно докази во предметот.

Во временскиот период од 2014 година до сега, од страна на повеќе институции пристигнати се поголем број други известувања, податоци  и писмена документација. Со поднесената кривична пријава доставени се и нови докази што го подигаат степенот на основаноста на сомнението дека кривичното дело е сторено, согласно што обвинителството и постапува.“ – велат од ЈОРМ

Сопругот на Шеќеринска во период од 5 години си изнајмувал на себе 3 стана во Скопје и 1 во Охрид. За нив плаќал неверојатни кирии кои достигнувале и 5300 евра за еден месец. На тој начин извлекол од Дајнерс над 300.000 евра.

Шеќеринска преку својата партија во два наврати испраќаше соопштенија во кои ги обвинуваше медиумите дека лажат, но денеска, ЈОРМ потврди дека пријавата е примена и дека ќе се отвори истрага против нејзиниот сопруг.