Свет
22. May 2018 - 16:14

ОАС не го признава Мадуро за легитимен претседател на Венецуела

- Организацијата на американските држави (ОАС) не ги признава резултатите од претседателските избори во Венецуела, изјави генералниот секретар на ОАС Луис Алмагро.
 
- Ние не го признаваме Николас Мадуро за легитимен претседател на Венецуела. Венецуела има потреба од преодна влада која ќе создаде легитимен изборен систем кој, од своја страна, ќе овозможи решенија за земјата, истакна Алмагро во изјава објавена на веб-страницата на ОАС.
 
Според податоци на Националниот изборен совет на Венецуела, Мадуро освоил околу 6,2 милиони гласови на изборите во неделата, а неговиот главен ривал Енри Фалкон освоил 1,9 милиони гласови.
 
 
Членовите на Групата од Лима вчера објавија дека одлучиле да ги повикаат своите амбасадори во Венецуела на консултации и нагласија дека не го признаваат исходот од изборите, бидејќи ги сметаат за незаконски.
 
САД, исто така, објавија дека не ги признаваат изборните резултати.