Нов криминал во Струмица? Со потпис на заев хотелскиот комплекс „Цареви кули“ е легализиран по сите датуми за легализација
Струмичкиот градоначалник Зоран Заев легализирал хотелски комплекс изграден по законскиот рок за легализација на објекти од март 2011, објави магазинот Република.
Според документите до кои дошол магазинот, барателот, извесен Коце Ристовски од Струмица, поднел барање за легализација на 4 бесправно изградени објекти во вкупна површина од 645 квадратни метри со намена хотелски комплекс. Градоначалникот Заев констатирал дека условите за легализација се исполенти и донел решение за утврдување на правниот статус на објектите на 7 март 2013.
Како што пишува магазинот, сето тоа би било фер и нормално, доколку во законот за легализација на дивоградбите не стои дека предмет на легализација може да бидат објекти што се изградени, односно постоеле пред март 2011 година.
Имено, сателитските фотографии од Гугл покажуваат дека на теренот каде што се наоѓа легализираниот хотелски комплекс, на 10 март 2011 година, има сосема друга состојба. Односно само два објекта кои заедно немаат вкупна површина од 40-ина квадратни метри. На фотографија од 4 септември 2013 година, пак хотелскиот комплекс е изграден.
Повикувајќи се на свои извори, Република посочува дека се работи за бизнис поврзан со фамилијата Заеви тврдејќи дека сопственикот на комплекост Коце Ристовски всушност бил само работник кој управува со имотот. Тој, освен хотелот, во 2013 добил решенија за легализација и на земјоделски парцели, шуми и деловни објекти во општината кои потоа ги подарил на сопругата.
Како што пишува магазинот, ако се пребара неговата адреса се појавуваат неколу документи за јавни набавки во Струмица, односно компанијата Чам Чифлик Голд, која управува ловиште, во 2012 од општината добила и тендер за поправка и уредување на тротоари вреден над 1,3 милиони денари, а во 2014 тендер од струмичкиот Комуналец вреден 2,7 милиони денари за мермери и гранит за 300 споменици.
Јавноста очекува државата да го провери овој, како и сите други сомнителни случаи на легализирани дивоградби во општината.
-
Филип Момировски
Сите содржини од овој новинар