Свет
5. December 2016 - 18:30

Нетанијаху: Со Трамп ќе разговараме за „лошиот“ договор со Иран

Израелскиот премиер Бенјамин Нетанијаху изјави дека откако новоизбраниот американски претседател Доналд Трамп ќе влезе во Белата куќа, сака со него да разговара за „лошиот“ договор меѓу Западот и Иран за иранската нуклеарна програма.

Нетанијаху зборуваше од Ерусалим преку видео линк на една конференција во Вашингтон, при што рече дека Израел е решен да го спречи Иран да дојде до нуклеарно оружје.

- Таквата наша позиција не е променета и нема да се промени, порача израелскиот премиер.

Тој остро го осуди договорот на шесте светски сили (Велика Британија, Германија, Кина, Русија, САД и Франција) со властите во Техеран, што официјален Вашингтон го смета за крупно постигнување на надворешната политика на претседателот на заминување Барак Обама.

За време на својата предизборна кампања, Трамп го осудуваше „нуклеарниот договор“ со Иран, нарекувајќи го „катастрофален“ и како „најлош што кога било досега бил договорен“.

Нетанијаху минатата година предизвика силно заладување на односите со САД, откако одлучи без договор со администрацијата на Обама да допатува во Вашингтон и да зборува за „лошиот“ договор со Техеран во американскиот Конгрес на покана од Републиканската партија.

Демократите го бојкотираа настапот на израелскиот премиер, а никој од Админстрацијата на САД не се сретна со него.

Последниве месеци, Нетанијаху значително го намали тонот на критиките за договорот, а посебно критиките кон Вашингтон, затоа што во тек се прегворите за финализирање на десетгодишниот американско-израелски договор за воена помош за Израел во вредност од 38 милијарди долари.

Нетанијаху во излагањето на вашингтонската конференција зборуваше за тоа дека Иран нема да го испочитува договорот за откажување од производството и за намалување на количеството на збогатен ураниум од 10.000 на само 300 килограми.

Тој тврди дека властите во Техеран, по заобиколен пат ќе се снабдат со овој неопходен елемент за производство на атомска бомба.