Немањето соодветни работници сериозен проблем за странските инвеститори во земјава

Странски компании кои вработуваат по неколку илјади луѓе не можат веќе да инвестираат во земјава бидејќи немаме доволно работници. Според вицепремиерот Анѓушев, државата треба да се фокусира да привлече компании кои ќе вработат помал број работници, но тие да бидат обучени и да добиваат висока плата.

Сепак, иако државата издвојува пари за преквалификација на кадарот, нема јасна слика за структурата на расположливиот кадар. Ќе треба да се почека пописот за да се види колку луѓе живеат надвор и според тоа да се направи стратегија.

-Видете што се бара... од високото образование се бара машински инженер, електро инженер, ИТ инженер, градежен инженер итн... Од делот на средните технички училишта се бара заварувач, оператор на CNC машина, бравар... Ама кога ќе видите на другата страна, на писокот на расположлив кадар, таков нема, истакна вицепремиерот Кочо Анѓушев.

И странските и домашните компании веќе некое време бараат од државата да се променат царинските тарифи и да се усогласат според Европската регулатива. Анѓушев рече тие се исти уште од пред 40тина години.

-Како Влада дадовме задача во рамките на Министерството на финансии и Царинската управа да се направи една анализа и каков импакт ќе има врз буџетот. Бидејќи мора да бидеме внимателни да не направиме сериозна дисторзија на приливната страна на буџетот, рече Анѓушев.

Македонија е домаќин на Европскиот самит на слободни зони. На панел-дискусиите и претставниците на земјите од регионот се пожалија дека имаат проблем токму со недостаток на квалификуван кадар.