Најмалку 11 лица се убиени при индиски напад на патнички автобус и село во пакистански Кашмир

Најмалку 11 лица се убиени денеска при индиско бомбардирање на патничи автобус и село во пакистански Кашмир во близина на линијата на поделба, соопштија локалните власти. 

Новите инциденти се случија во атмосфера на зголемена напнатост меѓу двете нуклеарни сили во спорната хималајска област.

Гранатите истрелани од страна на Индија погодиле автобус во Пакистан и при тоа се убиени девет лица. 

Останатите двајца починале во нивниот дом при напад со граната. 

Претставник на индиската армија изјави дека гранатирањето е одговор на пакистанското нарушување на прекинот на огнот. 

Тензиите во Кашмир ескалираа по убиството на сепаратистичкиот лидер во индискиот дел на спорната хималајска област во јули. 

Околу 100 лица загинаа при нападите во регионот во текот на последните месеци. 

Индија и Пакистан се обвинуваат меѓусебно за повеќекратни прекршувања на прекинот на огнот од 2003 година.

Двете нуклеарни сили и историски непријатели војуваа веќе три пати, откако добија независност од Британската империја во 1947 година.