Македонија
2. October 2016 - 14:37

На скопско Кале откриени над 13.400 археолошки предмети

Процесот на археолошки истражувања на Скопската тврдина Кале е целосно завршен и притоа се откриени над 13.400 предмети од различни периоди, од кои 4.527 монети, изјави Министерката за култура Елизабета Канческа Милевска.

Министерката Канческа Милевска денеска го посети археолошкиот локалитет на Кале и изврши увид во работите во рамки на проектот за конзерваторско-реставраторски работи и ревитализација на Скопската тврдина Кале, што го реализира Управата за заштита на културното наследство.

- Сите предмети се конзервирани и веќе се поделени во три збирки кои ќе бидат изложени во трите музеи на Кале. Музејот на праисторијата и музејот на отоманскиот период кои се целосно завршени, и музејот на средновековниот период, кој е во фаза на изградба, рече Милевска.

Посочи дека сите табли и патокази веќе се направени и се очекува по завршувањето на институционализирањето на Скопската тврдина Кале да бидат отворени музеите кои се на неколку нивоа и, како што рече, посетителите ќе можат слоевито да го видат развојот на сите временски периоди и изложените предметите да ги пренесат во времето од кое потекнуваат.

- Сите кули се конзервирани и ставени во функција, целата тврдина е осветлена и останува само уште археолошки да се истражи просторот на некогашниот ресторан Кале. Целосно е завршен и ревидиран проектот за урбанистичко уредување на Скопската тврдина Кале и се очекува управата во следниот период да започне со тендерската постапка. Предвидени се голем број елементи како уредување на летна отворена сцена, сувенирници, места за одмор и друг галериски простор, рече Канческа Милевска.

Истакна дека Скопската тврдина Кале има голем туристички потенцијал за промоција на вредното културно наследство, што го поседуваме како држава. Сите досегашни наоди и истражувања се претставени во три самостојни изложби и ќе се најдат во три посебни музејски збирки. 

Директорот на Управата за заштита на култутното наследство Виктор Лилчиќ, рече дека проектот се наоѓа на прагот пред триумф.

- Имаме над 13 илјади археолошки експонати, кои се извадени и конзервирани и веќе подготвени да влезат во овие музеи. Ние повторно го подигнавме овој древен централен цивилизациски пункт што доминира на целата денешна градска површина на Скопје. Посебно сум горд што во рамки на истражувањата се откри бронзено добна населба и монети на македонските антички кралеви Александар Македонски и Антигон Гонат, рече Лилчиќ.

Раководителот на проектот професорот Драги Митревски, рече сега се прават десет години од почетокот на ископувањата, а постигнатите резултати обично не се постигнуваат ниту за неколку пати по десет години.

- Внатрешноста на Скопската тврдина Кале е комплетно истражена. Со уредувањето прострот ќе се нарпави уште поатрактивен, кој и сега е атрактивен и секојдневно по најмалку седум автобуси со туристи влегуваат на овој простор, рече Митревски.

Ревитализацијата на Скопскатата тврдина Кале е проект на Владата, во рамки на кој од 2007 до 2012 година во континуитет се вршеа целосни системски археолошки истражувања на кои работел стручен тим од 300 луѓе од различни свери, како и студенти по археологија.