Свет
8. February 2018 - 17:31

Москва: Целта на САД во Сирија не е борба против ИД, туку преземање економски ресурси

 - Вистинска цел на САД во Сирија не е борба против џихадистичката група Исламска држава (ИД), туку преземање контрола над економските ресурси на земјата, оцени руското Министерство за одбрана.
 
Оценката на руското Министерство доаѓа по вчерашниот воздушен напад на хеликоптери на меѓународната антиџихадистичка коалиција, предводена од САД, врз сириските владини сили во близина на поранешната рафинерија за нафта „Ел Исба“, која се наоѓа на 17 километри југоисточно од градот Салхијах и е под контрола на бунтовниците.
 
Според руското Министерство, инцидентот уште еднаш покажува дека вистинската цел на „континуираното незаконско присуство на американските сили на територијата на Сирија повеќе не е борбата против меѓународната терористичка група ИД, туку преземањето контрола врз економските ресурси, кои единствено и припаѓаат на Сириската Арапска Република“.