Македонија
27. May 2016 - 12:58

МОН набави уште 20 интерактивни табли за училиштата

Министерството за образование и наука набави уште 20 интерактивни табли кои во текот на јуни ќе бидат распределени во дваесет училишта низ Македонија. Од почетокот на проектот се набавени сто т.н. смарт-табли наменети за основните и за средните училишта.

Проектот за опремување на училиштата со овој вид информатичко-комуникациска технологија Владата и МОН го почнаа пред две години со цел да се модернизираат условите за настава и да се развијат ИКТ-вештините на учениците.

- Министерството за образование и наука со одлука на Владата се обврза секоја година да набавува интерактивни табли во вредност од три милиони денари за потребите на училиштата. Во изминатите две години реализиравме набавка на сто интерактивни табли за нов и современ пристап во изведувањето на наставата, рече денеска на прес-конференција заменик-министерот за образование и наука Спиро Ристовски. 

Распределбата на интерактивни табли секоја година се прави врз основа на повеќе критериуми, меѓу кои се бројноста на учениците и недостигот на ваков вид технологија во училиштата.

Ристовски додаде дека МОН ќе продолжи со нови набавки на интерактивни табли кои во иднина треба да ги заменат класичните табли, кредите и сунѓерите.