Македонија и Турција одиграа без голови

 Фудбалските репрезентации на Македонија и Турција одиграа контролен, пријателски натпревар без голови.  

 

На средбата одиграна на Националната арена „Филиуп Втори“ во Скопје, Македонија и Турција одиграа 0:0.

 

Ова е трет меч во низа на кој црвено-жолтите завршија без примен гол и без пораз, по победите над Лихтенштајн и Белорусија. 

 

Избраниците на Игор Ангеловски го надиграа силниот противник, но немаа среќа да се радуваат на победата. Нашите фудбалери постигнаа два гола, но беа поништени поради офсајд. Даниел Мојсов во 19.минута по центаршут на Алиоски постигна погодок, но неоправдано беше поништен од бугарската судиска тројка поради наводен офсајд.  Алиоски во 54.минута вторпат ја затресе мрежата на Турција, но повторно судиите го поништија погодокот, поради пасивен офсајд на Пандев.

 

Најдобрата шанса за триумф ја имаше Иван Тричковски во 88.минута, но голманот Бабакан ја спаси од пораз екипата на Фатих Терим.

 

Македонија преку Пандев, Стјепановиќ и Трајковски од слободен удар имаше шанси за гол, но немаа среќа да се радуваат на водство.

 

Турците во текот на целиот меч немаа директен удар во голот на Димитриевски. 

 

Нашата селекција на 11 јуни игра против Шпанија во натпревар од 6. коло во квалификациите за СП во Русија.