Македонија
18. November 2017 - 9:17

„Магичен глас“ - концерт за деца на Македонската филхармонија

Македонската филхармонија денеска напладне ќе одржи симфониски концерт за деца насловен „Магичен глас“, на кој како солист ќе настапи сопранот Билјана Јосифов. Аниматор на концертот ќе биде актерот Мартин Јордановски, а  диригент  Дијана Илкоска-Имери. 

- Приказната се однесува за едно момче кое сака да стане оперски пејач и сонува сон во кој тој навистина пее оперски арии. Во сонот се појавува добрата вештерка, која е всушност оперска пејачка, и се обидува да му го оствари сонот...Приказната е полна со хумор и изненадувања и прекрасна музика соодветно избрана за најмладите слушатели, дела од Копланд, Бернштајн, Римски-Корсаков, Моцарт, Мусоргски, Штраус, Росини, соопшти Филхармонијата.

До крајот на годината ќе се одржи уште еден симфониски концерт за деца, на 23 декември, насловен „Новогодишни волшепства“ кој, како што наведува Филхармонијата, ќе донесе музика од класичната литература наменета за таа пригода.