Лицата со мултиплекс склероза и пркосат на болеста и бараат државата да им ја зголеми неопходната помош

Позитивна, насмеана и полна со енергија и пркоси на подмолната болест. Таква е нашата соговорничка Росана Ефремова која 16 години живее со мултиплекс склероза. Се нервира кога ја прашуваат дали МС значи дека го губи помнењето, но и знае да оди против правилата диктирани од лекарите. Иако бременоста не е препорачана за жените со оваа дијагноза, Росана е мајка на седумгодишен син.

-Ми велеа немој, како ќе биде после, посебно татко ми кој е погрижлив. Да, растењето на дете е потешко, 6 пати по породувањето бев во болница, но добро е, вели Росана Ефремова, жена со мултиплекс склероза.

Болеста и ја откриле кога имала 18 години и неколку месеци нејзините родители криеле од што боледува. Не се разочарала кога дознала дека има мултиплекс склероза а веќе извесно време работи во заштитна фирма како инвалидизирано лице.

-Се чудеа како 16 години имам МС а сум на нозе. Но направија се како што берше наложено, вели Росана.

Росана вели дека лицата со МС не смеат да бидат долго на сонце, да не стојат многу на нозе и да не креваат голема тежина.  Но им требаат и нови лекови на позитивната листа.

-Има околу 1700 со МС а само 450 се на терапија. Треба и нови лекови, вели Ефремова.

Веќе 32 години со оваа болест е и мајката на Росана, која вели дека се единствен случај во државата каде родител и дете имаат мултиплекс склероза. Побарала да направат испитувања и за нејзиниот син за утврдување на генетска предиспозиција, но лекарите ја предомислиле бидејќи тоа било речиси невозможно да се докаже.

-Ми рекоа нема реагенси кои ќе докажат дали има предизпозиција за добивање на МС, вели Росана.

Во здружението за мултиплекс склероза каде Росана е претседател, постојано има контакти со заболени кои или се кријат од јавноста или не сакаат да се соочат со дијагнозата. Како вистински борец им порача да бидат позитивни како неа.

-Да ја прифатат болеста бидејќи тоа им е продолжување на животот. Не е се така црно во животот, има и зошто и затоа, порача Росана.

Росана е свесна е за прогресијата на болеста, не се плаши од предизвиците   и со својата приказна сака да им покаже на сите дека со мултиплекс склероза се живее