Свет
8. January 2016 - 18:59

Лекари без граници: Во Мадаја во Сирија 23 луѓе починале од глад

Организацијата Лекари без граници соопшти дека од декември досега 23 луѓе ги загубиле животите поради глад во опколеното сириско место Мадаја во кое наскоро би требало да пристигне хуманитарна помош.

Организацијата наведува дека меѓу починатите се и шест бебиња, помлади од една година, а петмина се постари од 60 години.

Според сириската Организација за човекови права, уште 13 луѓе кои биле во потрага по храна загинале откако нагазиле на мини поставени од режимот, или се убиени.

ОН соопштија дека за 40.000 луѓе од кои половината деца, неопходна е итна помош во Мадаја. Сириската Влада вчера дозволи доставување помош за опколената Мадаја по наводите дека жители починале од глад. ОН се надеваат дека хуманитарната помош ќе стигне за неколку дена.