Балкан
16. October 2019 - 8:20

Косово: Почнува броењето на гласовите пристигнати по пошта

Централната изборна комисија (ЦИК) на Косово информира дека денеска во 10 часот ќе почне броењето на гласовите кои за вонредните парламентарни избори се испратени по пошта, јави дописникот на МИА од Приштина.

Според претходните информации од ЦИК, до неа од косовската дијаспора се пристигнати околу 15.500 пликови со гласови.

На вонредните парламентарни избори одржани на 6 октомври, врз основа на прелиминарните резултати, води Движењето Самоопределување (ВВ), со освоени 203 илјади гласови (25,49 отсто), додека втор е Деморкатскиот сојуз на Косово (ЛДК) со околу пет илјади гласови помалку. Оваа партија, која заедно со ВВ во минатото Собрание на Косово беше во опозиција, освои 197,7 илјади, или 24,82 отсто од досега преброените гласови.

Досега владејачката Демократска партија на Косово (ПДК) е трета со 169 илјади (21,24 отсто), а четврта е партијата на премиерот во оставка Рамуш Харадинај, која во коалиција со Социјалдемократската партија (ПСД) овои 92 илјади, или 11,57 отсто од гласовите.