Коневски и Чурлиновски повторно кандидати за градоначалници на Аеродром и Валандово

ВМРО-ДПМНЕ денеска објави дека нивни кандидат за градоначалник за општина Аеродром на претстојните локални избори ќе биде Ивица Коневски, а за општина Валандово, Николче Чурлиновски.

Генералниот секретар на партијата Христијан Мицковски на прес-конференција истакна дека се работи за кандидати кои веќе зад себе имаат успешно реализирани проекти.

- Понудата на ВМРО-ДПМНЕ како од аспект на кандидати, така и од аспект на програма и проекти се гаранција дека ВМРО-ДПМНЕ ќе продолжи да работи во интерес и во насока на реализација на потребите на граѓаните на Република Македонија. Граѓаните на Република Македонија знаат дека може да се потпрат на ВМРО-ДПМНЕ, бидејќи тоа гарантира продолжување на континуитетот на реализирани комунални и инфраструктурни проекти во нивната општина, рече Мицковски.

Тој додаде дека граѓаните за овие три месеци можеле да ја увидат разликата меѓу ВМРО-ДПМНЕ и СДСМ и посочи дека ВМРО-ДПМНЕ ќе има убедлива победа на претстојните локални избори.