Македонија
26. July 2016 - 11:33

Концерт на флејта и харфа на „Охридско лето“

Програмата на 56-тото издание на „Охридско лето“ продолжува со музичкиот дел, овојпат со концерт на Масимо Мерчели од Италија на флејта заедно со словенечката харфистка Мојца Злобко Вајгл.

Вајгл и Мерчели вечер од 21 часот во „Света Софија“ ќе изведуваат познати дела на Доницети, Бах, Росини, Дебиси, Моцарт, Ниман, Рамовш, Годефројд, Мариа Понце, Масне, Шопен.

Харфистката Мојца Злобко Вајгл е еден од водечките музичари во Словенија, со богата интернационална кариера како солист и камерен изведувач. Како солист досега има настапувано со голем број значајни диригенти и оркестри, додека како камерен изведувач често е дел од ансамбли во кои членуваат реномирани музички уметници.

Истакнатиот флејтист Масимо Мерчели изградил впечатлива уметничка кариера во која се забележуваат успесите на меѓународните натпревари и бројните концерти во најпознатите светски сали. Постојано соработува со врвните уметници на денешницата и со прочуените светски оркестри, а има остварено и премиерни изведби на неколку дела.