Македонија
25. January 2017 - 17:18

„Комунална хигиена“ апелира скопските општини да го расчистат снегот на улиците

Скопските општини да го расчистат снегот и мразот на улиците што се под нивна надлежност и да обезбедат пристап за собирање на отпадот,  апелираат од Јавното претпријатие „Комунална хигиена“ - Скопје.

Поради нерасчистените општински улици, како што се наведува во соопштението на „Комунална хигиена“, изминатиот период комуналните возила немале пристап до садовите за отпад што се поставени во овие улици и од тие причини садовите останувале неиспразнети и по неколку денови, за што има бројни реакции од граѓаните.

Во текот на вчерашниот и денешниот ден поради нерасчистениот снег и лизгавоста на теренот, не се испразнети садовите на улица „Славејко Арсов“ во општината Центар, на улиците „Тафталиџе“, „Будимпештанска“ и „Џумајска“ во општина Карпош, улица „1439“ и „Христо Татарчев“ во општина Кисела Вода, улиците „Ѓорги Крапчев“ и „Тодор Чангов“, во општината Аеродром, улица „Халим Алимиќ“ во општината Чаир, на улица „Алексо Демниевски“ во општината Ѓорче Петров, како и улиците „Че Гевара“, „Виничка“, „Морава“ и „Македонско-косовска бригада“, во општината Шуто Оризари, стои во соопштението на „Комуналан хигиена“ Скопје.

Откако ќе се создадат услови за пристап на специјалните комунални возила ЈП „Комунална хигиена“ – Скопје, се наведува во соопштението, ќе продолжи со своите активности со вообичаената динамика.