Македонија
21. March 2020 - 15:23

Комплетно опремени собите во „Ибис“ хотелите и подготвени да прифатат лица во изолација

Двата хотела „Ибис Скопје“ – „Ибис Центар“ и „Ибис Стајл“, кои „Аџибадем Систина“ и „Орка холдинг“ ги ставија на располагање по потреба на државата и на Министерството за здравство се комплетно опремени и подготвени се веднаш да прифатат лица на кои им е определена изолација.

Од „Аџибадем Систина“ информираат дека на располагање се ставаат вкупно 214 кревети, од кои 51 во двокреветни соби, 101 во еднокреветна соба и 3 соби за луѓе со посебни потреби.

– Хотелите располагаат и со шест фамилијарни соби. Сите се опремени соодветно на потребите и барањата за згрижување граѓани за кои е утврдено дека треба да се во изолација, од аспект на медицинска опрема и средства за дезинфекција, соопштуваат од „Аџибадем Систина“.

За лицата, посочуваат, ќе биде обезбедена храна и стручен медицински персонал.

– Освен редовна контрола на пациентите, за итни случаи докторите на „Аџибадем Систина“ ќе стојат целосно на располагање и ќе доаѓаат на повик. Доколку има лица кои ќе покажат симптоми на коронавирусот (Ковид-19), истите ќе се дислоцираат на посебен безбеден начин до локации кои Министерство за здравство ќе ги определи за третман на заболените, информират од „Аџибадем Систина“.