Македонија
17. February 2021 - 13:39

Ќучук: Да се врати довербата меѓу Македонија и Бугарија, историјата да се остави на историчарите

 Билатералните прашања да се решаваат во билатерален формат, а историјата треба да биде оставена на историчарите. Важен дел од секоја рамка се добрососедските односи. Потребно е да се врати меѓусебната доверба, со цел да изградиме здрави добрососедски односи за идните генерации.

Ова денеска го изјави известувачот во Европскиот парламент за Македонија, бугарскиот европратеник Илхан Ќучук, кој е во посета на земјава, на заедничката прес-конференција со шефот на дипломатијата Бујар Османи.

– Историските прашања треба да се решаваат од компетентни историчари. Разговорите за историјата треба да бидат оставени на професионалци. Политичарите се одговорни да носат политички одлуки, не да ги сокријат под килим, и да речат виновни се историчарите, рече Ќучук, додавајќи оти заедничката Комисија треба да ја продолжи работата и оти мора да се врати меѓусебната доверба, бидејќи, посочи, без тоа не можат да се постигнат добри резултати.

Ќучук посочи дека нивната улога како политичари е да не прават ѕидови, туку да ги уриваат, а граѓаните на Македонија и на Бугарија да живеат во попросперитетен свет.

– Стратешки интерес на Македонија е да биде во ЕУ, а исто така и стратешки интерес на Бугарија е Македонија да биде дел од ЕУ, и поради тоа има потреба од разговор, чесност во односите, враќање кон Договорот од 2017, бидејќи без доверба не можат да бидат постигнати добри резултати, потемцира Ќучук.

Во однос на нацрт-резолуцијата за земјава, што претстои да се усвои од страна на Европарламентот, Ќучук рече дека неговата улога како известувач е објективна и ја отсликува реалната слика за земјава, истакнувајќи дека Македонија има силен ангажман во реформите.

– Достигнувањата како што се членството во НАТО и во ЕУ бараат наднационален консензус и во тоа сите треба да имаат улога – граѓаните повеќе да бараат од политичарите, но и конструктивност од опозицијата. Реформите, што се важен дел од програмата на Владата, треба да продолжат многу интензивно, бидејќи Европската Унија бара длабоки реформи, рече Ќучук.

Тој истакна дека во тешки моменти Македонија подавала рака на ЕУ и обратно – Унијата подавала рака на Македонија, бидејќи, како што оцени, интерес на ЕУ е да биде глобален политички играч ,а тоа е можно само со интегрирање на Западниот Балкан во Европската Унија.

Шефот на дипломатијата Османи, од своја страна посочи дека Македонија испорача на сите полиња и заслужува вреднување, а ЕУ треба да ја операционализира одлуката од март минатата година и да ја одржи првата меѓувладина конференција.

– Европскиот парламент да го вреднува нашиот напредок. Сведоци сме на гласната поддршка на Европскиот парламент во сите фази на нашето пристапување во ЕУ и ја цениме Вашата лична заложба што овој важен документ што го изготвувате, ќе ја отсликува реалната слика и ќе претставува важен импулс не само за земјава, туку и за регионот, посочи Османи.

Османи, во контекст на дијалогот со Бугарија, додаде оти земјава е подготвена да работиме за да ги отстрани сите пречки кон полноправното членство во ЕУ.

– Се одвива политички дијалог со Бугарија да не дозволиме поширок застој во билатералните односи, а во тој контекст при крај сме и со Акцискиот план, рече министерот Османи.