Македонија
17. August 2019 - 8:33

Ќе се врши санитарен отстрел на дива свиња во Македонска Каменица

Во насока на заштита од болеста африканска чума, а согласно насоките на Агенцијата за храна и ветеринарство, во Македонска Каменица се организира акција за санитарен отстрел на дива свиња.

Како што информираше Гоце Стоиловски од ловното друштво „Каменица-Саса“ на самиот лов ќе присуствуваат и лица од Агенцијата за храна и ветеринарство.

– Во моментот се изготвуваат списоци за дозволи за движење во шума, а потоа ловците ќе можат да подигнат дневни дозволи и да се потпишат лично дека се запознаени со начинот на лов според однапред утврдените решенија од АХВ и МЗШВ. На самиот лов ќе присуствуваат инспектор од АХВ и ловен инспектор, а месото од евентуално отстреланите диви свињи ќе се чува во посебен фрижидер додека се добијат резултатите од АХВ, информира Стоиловски.

Стоиловски апелира за време на оваа активност да се внимава со опушоците од цигарите, да не се пали оган на отворено се со цел да се зачуваат самите ловишта и шумите.

Акцијата ќе се спроведе идната недела, а сите заинтересирани кои сакаат да учествуваат во санитарниот отстрел на диви свињи можат да се пријават во канцеларијата на ловното друштво во Македонска Каменица.