Кирацовски обвинува за притисоци во јавниот сектор

Заменик министерот за информатичко општество и администрација Александар Кирацовски денеска на прес-конференција изјави дека има информации оти биле вршени притисоци врз вработени во јавниот сектор и во државните претпријатија, како што посочи, да одат на контрапротестот пред Уставниот суд на РМ.

Најави дека ќе испрати управна и трудова инспекција во сите институции за кои има информации дека имало вакви злоупотреби.

- Во сите институции за кои имам информации за вакви злоупотреби на администрацијата ќе испратам управна и трудова инспекција. Казните за директорите, раководителите, градоначалниците, за сите оние кои го правеле тоа се мошне сериозни и им порачувам да не ги занемаруваат, рече Кирацовски.

Додаде дека сите кои, како што рече, противуставно нанеле и нанесуваат штета на правата и интересите на граѓаните ќе одговараат.