Македонија
14. April 2018 - 16:29

Казнени и превентивни мерки по објавената скандалозна снимка на која малолетнички крвнички тепаат соученичка

Педагошки мерки за деветоодделенките  кои брутално тепаа соученичка во основното училиште Гоце Делчев во Неготино, пријава во полиција и педагошки разговор со родителите на учесниците во тепачката. Ова е епилогот од случајот на крвничко тепање едно девојче од страна на две малолетнички, а сето објавено во јавноста со скандалозната снимка. 

Ги презедовме сите мерки кои се во наша надлежност. За случајот ги известивме сите надлежни служби и пријавивме во полицијата во Неготино. Разговаравме со девојчињата кои се во деветто одделение,  се вклучија наставниците, педагогот и психологот. Изречени се педагошки мерки. Две од овие ученички и во минатото имале проблеми со доброто поведение, изјави за Сител Петар Мантев, директор на ОУ Гоце Делчев во Неготино.

Згрозена од снимката е и министерката за образование Рената Дескоска. Очекува раководството на училиштето да ги преземе сите мерки за решавање на овој случај. Признава дека ова е системски проблем и дека на образованието му фали воспитната мерка. Неа ќе ја вратат со реформите во овој сектор.

- Ја предвидуваме и воспитната мерка. Во законот за основно што го направивме а ќе има сега и за средно, има мерки за зголемена едукација за родителите, кои ќе мора да знаат дека казнените мерки ќе бидат подеднакви и за учениците и за родителите, вели Рената Дескоска, министер за образование.

За скандалозната снимка со учениците на која има насилници и жртва реагираше и првата детска амбасада меѓаши.

Овој брутален настан покажува дека е напразно секакво трансформирање на образованието ако се запоставува елементарната функција а тоа е воспитанието на младите но и ако не се работи на превенција на насилството во училиштата. Тоа е и потврда за недоволната грижа или немањето капацитет за справување на училиштата со проблемите на учениците и нивното однесување и потешкотиите со кои секојдневно се соочуваат.

Според информациите од МВР, по понеделник во полицикста станица во Неготино на разговор се повикани родителите на девојчињата инволвирани во тепачката.