Бизнис
21. January 2019 - 15:53

Карбинци утре ќе добие фотоволтаици за три објекти

Карбинци е првата општина во источна Македонија што ќе ги добие фотоколектори за производство на електрична енергија од обновливи извори на енергија. Градоначалникот на Општина Карбинци, Јордан Насев за МИА вели дека за утре е закажано пристигнувањето на фотоволтаците кои ги добиваат како грант од Владата, по што ќе следи нивно монтирање на три објекти.

-Фотоволтаците ќе бидат поставени на зградата на Општина Карбинци, потоа на училиштето „Страшо Пинџур“ во село Карбинци и на препумпната станица за вода во село Таринци, што е и еден од најголемите потрошувачи на електрична енергија, вели Насев.

Тој истакна дека со овие фотоволтаци ќе се осветлува, но и  системот за затоплување  од нафта ќе се преадаптира на затоплување од обновиливи извори на енергија во општинската зграда, истата функција ќе ја имаат и за основното училиште „Страшо Пинџур“. Заштедата на електрична енергија за оваа општина ќе биде околу 20.000 евра, што е и голема сума за една мала општина.

Насев вели дека заштедените средства ќе можат да се искористат и планираат за реализација на низа на проекти во населените места во општината.