Јовески: Очекувам дека во наредните денови ќе заврши утврдувањето на идентитетот на загинатите

Во денешната Тема на денот во Дневникот на Сител Љубомир Јовески, државниот јавен обвинител рече дека целосно е завршено земањето на материјал од роднините на починатите лица и извршена е ДНК анализа на телата на загинатите во сообраќајната несреќа во Бугарија на автопатот „Струма“.

– Целосно е завршено земањето на материјал и извршени се ДНК анализите. Јас имам уверување од директорот на Судска медицина дека утре најкасно до 12 часот овие материјали ќе бидат комплетно обезбедени за да може да им се предадат на истражителите од Бугарија. Верувам дека тоа ќе биде брзо. И бугарската и македонската страна работи на тоа што побрзо да бидат пренесени остатоците во земјата и да бидат предадени на нивните блиски. Утврдувањето на идентитетот на загинатите во незгодата нема да трае долго. Очекувам во следните неколку денови тој процес да заврши. Јас имам информација дека обдукциите во Бугарија се завршени, извршени се ДНК анализи на загинатите. Таму ќе треба само тие податоци да се споредат, верувам дека тој процес нема да одземе повеќе од неколку денови, истакна Јовески.