Јолевски на „Future Forces Forum 2016“: Македонија останува посветена на членството во НАТО и ЕУ

Членството во НАТО и во Европската Унија останува наш стратешки приоритет. Имајќи ги предвид геополитичките промени на глобални рамки, интегративните процеси во евроатлантските структури позитивно влијаат на мирот, соработката, безбедноста и економскиот и демократскиот развој на државите, истакна министерот за одбрана на Република Македонија Зоран Јолевски денеска во обраќањето на „Future Forces Forum 2016“ што се одржува во Прага, Чешка.

Министерот Јолевски, кој на Форумот е придружуван од страна на генералот Васко Ѓурчиновски, командант на Здружената оперативна команда на АРМ, посочил дека реформските процеси во одбраната и другите области продолжуваат, бидејќи тие првенствено се добри за нас, нашите граѓани, а потоа и за процесот на евроатлантска интеграција. Во тој контекст, соопшти денеска МО, министерот се заблагодарил за отворената и принципиелна поддршка за членство во НАТО, од страна на домаќинот, Република Чешка.

- Динамичниот развој на меѓународната безбедносна сцена бара континуирано следење и прилагодување кон безбедносните закани и ризици. Република Македонија припаѓа на eвроатлантскиот регион и нејзината безбедност е неделива од безбедноста на регионот и пошироко, посочил министерот Јолевски.

Тој додал дека светот се соочува со повеќе предизвици, ризици и закани, меѓу кои ги спомена тероризмот, транснационалниот организиран криминал, хибридната војна, илегалната миграција и други. Во контекст на миграцијата, министерот посочил дека поради својата географска положба Македонија минатата година се најде во комплицирана ситуација со секојдневниот наплив на мигранти.

- Актуелната мигрантска криза претставува феномен незабележан во поновата историја, феномен кој ги надминува националните граници и бара глобален и регионален координиран ангажман, рекол министерот Јолевски на Форумот.

На маргините на форумот, министерот Јолевски остварил и неколку билатерални средби меѓу кои и со началникот на Генералштабот на чешките вооружени сили, генералот Јосеф Бечвар, како и со генералот Петр Павел, претседавач на Воениот комитет на НАТО.

На средбата со генералот Бечвар, министерот Јолевски изразил задоволство од нивото на соработка помеѓу двете армии. - Ние соработуваме за повеќе прашања од областа на одбраната, особено справувањето со мигрантската криза, размената на информации за актуелната безбедносна состојба, како и во областа на военото образование, рекол министерот и додал дека таа соработка ќе продолжи и ќе се интензивира во иднина, соопшти МО.