Свет
31. March 2023 - 11:07

Израелската војска втора ноќ по ред гаѓа цели во предградијата на Дамаск

Израелската авијација и синоќа, втора вечер по ред, ги нападна предградијата на сирискиот главен град Дамаск, јави сириската државна агенција САНА.

-Експлозии се слушаат над Дамаск втора ноќ по ред, изјавуваат  жители на сирискиот главен град, јави САНА, но не соопштува дали има жртви во нападите.

На нападите на израелската авијација одговорила сириската противвоздушна одбрана и притоа биле пресретнати и соборени некои израелски ракети.

Сирискиот Центар за мониторинг на човековите права, со седиште во Велика Британија, опозициска организација која ја следи граѓанската војна во Сирија, соопшти дека биле погодени складишта за оружје на владините сили и организациите поддржани од Иран, јужно од Дамаск.

Израел многу пати досега напаѓаше цели во сириските области  контролирани од владата во Дамаск, вклучувајќи и напади на аеродромите во главниот град и во Алепо, но ретко ја презема одговорноста.